Har yili mavsum kelishi bilan odamlar pilla qurti boqishga oshiqishadi, ayniqsa qishloq aholisi. Paxtachi tumanida ham fermer xo’jaliklari ko’p bo’lgani uchun pilla qurtlari boqiladi. Ammo ularga qarashning ham o’z mashaqqati, qiyinchliklari bor.
“Nahripay” mahallasida istiqomat qiluvchi bir nechta xonadonda ham pilla qurti boqiladi. Biz borgan xonadonlarimizdan birida, Xudoyberdi Ulug’ov va Risolat Hotamova 25 yildan buyon birga yashashadi. Ular 5 farzandning ota-onasi bo’lib, yillar bo’yi har mavsumda pilla qurti boqishgancha, ro’zg’orlari kamini to’ldirishadi. Ikki qizlarini turmushga bergan. Uch o’g’il esa mavsumiy ishchi. Bir o’g’liga mahalla yoshlar yetakchisi ko’magi bilan “Muravey” rusumli mototsikl berilib, bandligi ta’minlangan. Sharoit og’ir bo’lishiga qaramay, ular doim “harakatda baraka bor” deb tinmaydi.
— Ikki quti pilla qurti olganmiz, bir oy ichida topshirish kerak. Tut barglarini olib kelishda qiyinchilik bo’ladi. Bir-bir yarim kilometr uzoqlikga borib kelamiz. Gaz bo’lmasada, pilla qurtlarini elektropech va o’tin bilan isitdik, — deydi R. Hotamova.
Keyingi xonadon sohibi Shuhrat Sadinov ham bir quti pilla qurtlarini parvarish qilmoqda. Oilada 10 kishi yashashadi, ammo bironta davlat ishida ishlaydigani yo’q. Ularga pilla qurti ortidan un va yog’ berilgan. Uzoq masofadan tut daraxti barglarini eshak-aravada olib kelishadi.
— Ayolim va o’zim mavsumiy ish qilamiz. Ikkita o’g’lim bor. Ota-onam, turmushidan qaytgan opam, ukamning ikki farzandi bilan birga yashaymiz, — deydi Sh. Sadinov. — Sharoitimiz og’ir bo’lganligi uchun mahalladan yordamlar beriladi. Pilla qurti boqishda jiyanlarim yelkadosh bizga.
Inson har qanday sharoitda ham tirikchilik qilishdan qaytmaydi. Buning isboti esa yuqorida tanishtirganlarimizdur. O’zlarining yashashi uchun xona kamlik qilsa-da, pilla qurtiga joy ajratishgan. Mehnatkash, sodda insonlar bor ekan, har ishda baraka va xayr bo’ladi. Bizga yaqindan yordam bergan “Nahripay” mahallasining yoshlar yetakchisi Shohrux Tuxmurodovga o’z minnatdorligimizni bildiramiz!
