3 ta Oʻzbekistonga yetadigan gazimiz bor, degan vazir tizimga qaytdi
Sobiq energetika vaziri Alisher Sultanov prezidentning neft, gaz, kimyo va energetika masalalari boʻyicha maslahatchisi etib tayinlangan.
Alisher Sultanov (1967-yilda tugʻilgan) A. F. Mojayskiy nomidagi harbiy-muhandislik institutini tamomlagan (1989). 1996−1998-yillarda “Oʻzneftqaytaishlash” kompaniyasi Buxoro neftni qayta ishlash zavodi qurilishi boʻyicha shartnomani bajarish boʻyicha direksiyasining uskuna va qurilmalarni tayyorlash hamda qabul qilishni nazorat qilish boʻyicha bosh mutaxassis lavozimida ishlagan.
1998−1999-yillarda Shoʻrtan gaz-kimyo majmuasi qurilishida bosh mutaxassis, 1999−2002-yillarda — “Oʻzbekneftgaz” kompaniyasi Shoʻrtan qurilishi boshqarmasi boshligʻi sifatida ishlagan.
“Shoʻrtan gaz-kimyo majmuasi” unitar shoʻba korxonasiga rahbarlik qildi (2002−2013). 2013−2015-yillarda “Oʻzbekneftgaz” Prognozlashtirish, resurslar va investitsion dasturlar bosh boshqarmasi boshligʻi — boshqaruv raisining birinchi oʻrinbosari, 2015−2018-yillarda — “Oʻzbekneftgaz” boshqaruvi raisi lavozimlarida faoliyat koʻrsatgan.
Yodingizda bo’lsa, u 2019-yilning fevralida Energetika vazirligiga rahbarlikka tayinlangandi va 2022-yilga kelib Prezident farmoniga asosan, Alisher Sultanov salomatligi tufayli boshqa ishga oʻtishi munosabati bilan energetika vaziri lavozimidan ozod etilgandi.
U 2021-yilda «Amerika ovozi» mustaqil internet nashriga bergan intervyusida oʻzbek gazi haqidagi savollarga javob bera turib, 3 ta Oʻzbekistonni boqishga yetadigan gaz zaxirasi borligini aytgandi.
