O‘zbekiston Respublikasi Prezidenti Shavkat Mirziyoyevning 2023 yil uchun tadbirkorlar bilan navbatdagi ochiq muloqoti bo‘lib o‘tishi kutilmoqda.
Muloqot «20 avgust – Tadbirkorlar kuni» doirasida tashkil etilishi rejalashtirilgan.
Ungacha hududlarda tadbirkorlar muammolarini o‘rganish va hal qilish bo‘yicha ishchi guruhlari tuzilib, ularning asosiy vazifalari etib quyidagilar belgilanmoqda:
– tadbirkorlarning murojaat va takliflarini tunu kun qabul qilish va umumlashtirish;
– tadbirkorlik faoliyatiga to‘sqinlik qilayotgan tizimli muammolarni aniqlash va ularning yechimi bo‘yicha takliflar ishlab chiqish;
– tadbirkorlarning individual masalalari joylarda tezkorlik bilan hal etilishini ta’minlash.
Shu bilan birga, «Tadbirkor virtual ofisi» axborot portali, «Call-markaz», ijtimoiy tarmoqlar va sayyor qabullar orqali tadbirkorlar murojaatlarini tunu kun qabul qilish va umumlashtirish bo‘yicha Investitsiyalar, sanoat va savdo vazirligida vazirlik va idoralar vakillaridan iborat shtab tashkil etildi.
