Ishtixonda noyob qush hisoblangan Tasqara topib olindi. Bu haqda tumanning «Ishtixon ovozi» gazetasi Telegram sahifasida xabar bermoqda.
Xabarda aytilishicha, uni topib olgan shaxs tuman ekologiya boʻlimiga topshirgan.
Tumanning “Qiyot” mahallasida yashovchi Ergashali Mustanov oʻzining uyi atrofiga bir qanoti yaralangan nomaʼlum yovvoyi yirtqich qush kelib qolgani koʻrgan. Koʻrinishidan mahalliy qushlarga oʻxshamaganligi sababli tabiatga befarq boʻlmagan ushbu fuqaro, mutaxassislarga murojaat qilgan.
Aniqlanishicha, ushbu qush burgutsimonlar oilasiga mansub Tasqara qushi boʻlib, Oʻzbekiston Respublikasi “Qizil kitobi”ga kiritilgan.
Ayni paytda mazkur qush tuman ekologiya, atrof-muhitni muhofaza qilish va iqlim oʻzgarishi boʻlimi davlat inspektorlari tomonidan qabul qilib olinib, Zarafshon milliy tabiat bogʻining reabilitatsiya markaziga maxsus tibbiy koʻrikdan oʻtkazish maqsadida topshirilgan. U tez orada tabiat qoʻyniga qoʻyib yuborilishi aytilmoqda.
