Shanxay hamkorlik tashkilotiga aʼzo davlatlarning Birinchi transport forumida O‘zbekiston transport vaziri Ilhom Mahkamov «Xitoy—Qirg‘iziston—O‘zbekiston» temiryo‘lini qurish ishlari qachon boshlanishini maʼlum qildi.
Unda ishtirok etgan Ilhom Mahkamovning aytishicha, Xitoydan Qirg‘iziston orqali O‘zbekistonga avtotransport harakati uchun sharoit yaratib berilgan.
“Galdagi asosiy harakatimiz Qirg‘iziston hududida temiryo‘l qurish loyihasi turibdi. Bu bo‘yicha uchta mamlakat — Xitoy, Qirg‘iziston, O‘zbekiston birgalikda texnik-iqtisodiy asoslarni ishlab chiqqan.
Bugungi kunda ushbu loyihani kim amalga oshirishi bo‘yicha muzokaralar olib boryapmiz. Qurilish ishlarini kelgusi yildan boshlashni maqsad qilganmiz”, — dedi transport vaziri.
Uning qo‘shimcha qilishicha, mazkur temiryo‘l qayerlarda qurilishi va yo‘nalishlari kelishilgan.
Bu loyiha ancha ilgari boshlanishi kerak edi. Ammo noma’lum sabablar bilan u ortga surilib kelinayotgandi. 2018-yilda ikki davlat – O’zbekiston va Xitoy Xalq Respublikasi rahbarlari telefon orqali muloqotida «Oʻzbekiston – Qirgʻiziston –Xitoy» temir yoʻl liniyasini qurish loyihasi birgalikda tayyorlanayotganligi ta’kidlangandi.
