Jinoyat ishlari Bo‘yicha Samarqand viloyati Paxtachi tuman sudining yopiq sud majlisida sudlanuvchi D. E.ga oid jinoyat ishi ko‘rib chiqildi.
Sudlanuvchi D. E. shaxsning tanasi va a’zolarining yalang‘och holdagi tasvirini o‘z ichiga olgan axborotni uning roziligisiz internet ijtimoiy tarmog‘ida tarqatish maqsadida, 2023-yil may oyining o‘rtalarida Paxtachi tuman “Istiqlol” mahallasiga kiraverishdagi ko‘p qavatli uylar yaqinida tanishi, “Toshko‘prik” mahallasida yashovchi 2006-yilda tug‘ilgan, voyaga yetmagan X. H.ni uning o‘n sakkiz yoshga to‘lmaganligini bila turib, egnidagi ko‘ylagining tugmalarini yechib, tanasining ko‘krak sohasini suratga olgan. Voyaga yetmagan qizning sha’ni va qadr-qimmatini kamsitib, suratni internetning instagram ijtimoiy tarmog‘idagi o‘ziga tegishli sahifasi orqali tarqatib yuborgan.
Sudda so‘roq qilingan D. E. o‘z ko‘rgazmasida, X. H. bilan 2022-yil iyun oyidan buyon tanish ekanligi, uni yaxshi ko‘rishini, X. H.dan shu kunga qadar umuman qarzga ham, aldab ham pul olmaganligi, bir marta X. H. uning telefon raqamiga 55 000 so‘m pul tashlaganligi va bu pulni unga qaytarib berganligini bayon qildi. Sudlanuvchi qizni suratga tushirganini tan olgan holda, uni ijtimoiy tarmoqda tarqatganligiga iqrorlik bildirmadi. X. H. unga tuhmat qilayotganligini, o‘ziga nisbatan qonuniy yengillik berilishini so‘radi.
Sudda qonuniy vakili ishtirokida so‘roq qilingan jabrlanuvchi X. H. o‘z ko‘rgazmasida, u D. E. bilan 2022-yil iyun oyida Instagram internet ijtimoiy tarmog‘i orqali tanishganligini, oradan bir oycha o‘tgach, bir-birini yoqtirib qolganliklarini so‘zladi. D.E. undan 2022-yil avgust-sentabr oylaridan boshlab, o‘zining kundalik sarf-xarajati uchun 200 ming so‘m, 300 ming so‘m pullarni bir-ikki kun ichida qaytarishini aytib, qarzga olib turganligini, lekin umuman qaytarmaganligini ta’kidladi. U 2023-yil may oyining o‘rtalarida soat taxminan 11 da darsdan chiqib, uyiga qaytayotganida D. E. unga qo‘ng‘iroq qilganligi va uchrashishni taklif qilganligini, ular yangi qurilgan ko‘p qavatli uylarning orqa tomonida uchrashganligini bildirdi. Uchrashishi-dan bir necha kun oldin D. E. undan 50 mil-lion so‘m pul so‘ray boshlaganligini, unga pul bermasligini aytganligini, uchrashuv chog‘ida undan 50 million so‘m pulni olib kelgan-olib kelmaganligini so‘raganligini, u unga pulni olib kelmaganligini, buncha pulni unga olib kelib bera olmasligini aytganligini qayd etdi. Bundan D.E.ning jahli chiqib, uning egnidagi ko‘ylagining tugmalarini yecha boshlaganini, undan bunday qilmasligini so‘raganligini, shunda D.E. qo‘li bilan uni bosh sohasiga bir marotaba urganligi, oyog‘i bilan qorin sohasiga ikki marotaba tepganligini, ko‘ylagining tugmalarini yechib tashlab, siynabandining ichidan o‘ng ko‘kragini chiqarib, o‘zining telefoniga suratga tushirib olganligini, nima uchun suratga tushirayotganini so‘raganida, agar soat 14 gacha 50 million so‘m pulni keltirib bermasa, uni sharmanda qiluvchi suratlarini internetda tarqatib yuborishini aytib, qo‘rqitganligini bayon qildi.
2023-yil 13-iyun kuni soat 20 larda onasi F. S. uyga kelib, unga bir qarindoshining telefonidan ijtimoiy tarmoqlar orqali yalang‘och holdagi suratini yubortirib, unga bu nima ahvol deb ko‘rsatganligini, so‘ng u onasiga bo‘lgan voqealarni aytib berganligini va onasi bilan birga o‘sha kunning o‘zida tuman IIBga kelib, D.E.ga nisbatan qonuniy chora ko‘rish haqida ariza bilan murojaat qilganliklarini ma’lum qildi.
Sudlanuvchi D.E.ning aybi ish hujjatlarida mavjud bo‘lgan ariza, daliliy ashyoni olish to‘g‘risidagi bayonnoma va suratlar, jabrlanuvchining ko‘rsatuvlarini hodisa sodir bo‘lgan joyda tekshirish bayonnomasi va fotojadvallar, tushuntirish xatlari va so‘roq qilish bayonnomalari hamda jinoyat ishida to‘plangan boshqa hujjatlar bilan isbotlandi.
Sud, jabrlanuvchi X. H. va uning qonuniy vakili F. S.ga jinoyat oqibatida yetkazilgan moddiy va ma’naviy zararlarni undirish xususida tegishli hujjatlarni to‘plagan holda fuqarolik ishi yuritish tartibida sudga murojaat qilish huquqiga ega ekanligini tushuntirdi.
O‘zbekiston Respublikasi Jinoyat – protsessual kodeksining tegishli moddalariga amal qilib, sud sudlanuvchi D.E.ga 3 yil muddatga ozodlikni cheklash jazosini tayinladi.
Aziz SHAMSIQULOV,
Samarqand viloyat prokuraturasi organlari tergov jarayonlari ustidan nazorat bo‘limi prokurori,
Mirzohid YORQULOV,
Paxtachi tuman prokurorining katta yordamchisi
