Telegram asoschisi Pavel Durov yozni Markaziy Osiyoda o‘tkazishini e’lon qildi. Bu haqda u o‘zining Telegram kanalida ma’lum qildi.
Dubayda istiqomat qiluvchi Durov mamlakatda havo harorati keskin isiyotganini aytdi.
Do‘stlarim Fransiyaning janubi kabi zamonaviy joylarga bormoqda. Fransiya fuqarosi sifatida bu davlatni dam olish uchun eng yaxshi joy ekaniga qo‘shilaman, — deb yozgan u.
Biroq u Telegram bosh direktori sifatida ta’tilga chiqmasligini qayd etgan.
Buning o‘rniga, foydalanuvchilarimiz bilan noodatiy joylarda uchrashish orqali ish faoliyatimni davom ettiraman. Bu yozda Markaziy Osiyoga tashrif buyurib, u yerda hayot qanday kechayotgani, odamlar Telegram’dan qanday foydalanishlarini va ularning raqamli ehtiyojlarini o‘rganishga qaror qildim, — degan messenjer asoschisi.
Mart oyida Telegram asoschisi messenjerdan foydalanuvchilar soni 900 millionni tashkil etishini aytgandi. O‘zbekistonda aprel oyida olib borilgan tadqiqotga ko‘ra, ilovaning 18 milliondan 24 milliongacha foydalanuvchisi bor. Natijalarga ko‘ra, 54 foiz odam Telegram’dagi ma’lumotlarga ishonishini bildirgan. Foydalanuvchilarning katta qismi ushbu messenjerdan 1-3 soat vaqt foydalanadi. Sal kam 60 foiz odam yangiliklar kanallarini kuzatadi.
