17-mart kuni tumanning “Tinchlik” mahallasidagi dalalarning birida sodir etilgan yong‘in haqida 20-mart kuni “MUHIM24″ saytining telegram sahifasi orqali xabar bergan edik.
“MUHIM24.uz” sayti jurnalistlari holat bo‘yicha dastlab Ekologiya va atrof-muhitni muhofaza qilish tuman bo‘limi bilan bog‘landi. Ular vaziyat bo‘yicha O‘rmon xo‘jaligi tuman bo‘limi o‘rganish olib borayotgani haqida ma’lum qilishdi. Shundan so‘ng tahririyat tuman O‘rmon xo‘jaligi mutasaddilari bilan ham muloqotda bo‘lib, vaziyatga aniqlik kiritdi.
O‘rganishlar davomida “Tinchlik” mahallasidagi dalada kelib chiqqan yong‘in Paxtachi tuman o‘rmon xo‘jaligi “Oqtepa” o‘rmon bo‘limiga tegishli maydonda sodir etilgani aniqlandi. Holat 17-mart kuni taxminan soat 18:10 larda “Paxtakor” uchastka o‘rmonchisi Tursunov Ulug‘bekning qo‘l telefoni orqali tasvirga olingan. Mazkur uchastkaning 43-konturi xo‘jalik balansidagi sun’iy baliq havzasining 2,3 gektar yer maydonida to‘liq yong‘in kelib chiqqan. Yong‘in zudlik bilan xo‘jalik mutaxassislari tomonidan shu kunning o‘zida, soat 18:35 lar atrofida to‘liq bartaraf etilgan.
Foto: Paxtachi tuman O’rmon xo’jaligi tomonidan «MUHIM24.uz»ga taqdim etilgan hujjatlardan olindi
Tabiatga yetkazilgan zarar miqdori hamda ushbu yong‘in nima sababdan kelib chiqqanligiga yoki kim tomonidan sodir etilganligiga aniqlik kiritish maqsadida “Paxtakor” uchastkasi o‘rmonchisi Tursunov Ulug‘bekdan tushuntirish xati olingan. Tursunov Ulug‘bek o‘z tushuntirish xatida ushbu yong‘in “Tinchlik” mahallasida yashovchi 1986-yilda tug‘ilgan fuqaro (yakka tartibdagi tadbirkor) R.S tomonidan qasddan sodir etilganligini bayon etgan.
Fuqaro R.Sning ushbu xatti-harakatiga huquqiy baho berilib, holat yuzasidan ma’muriy bayonnoma rasmiylashtirilgan. Unga ko‘ra, Paxtachi tuman O‘rmon xo‘jaligi tomonidan “Ma’muriy javobgarlik to‘g‘risidagi kodeks”ning tegishli moddalari bilan 14 mln 250 ming so’m jarima qo’llanilgan.
Foto: Paxtachi tuman O’rmon xo’jaligi tomonidan «MUHIM24.uz»ga taqdim etilgan hujjatlardan olindi
Xo‘sh, nega tadbirkor bunday harakatlarni sodir etdi?
Bunda aniq sabab bormi? Bu savollar yuzasidan O‘rmon xo‘jaligi bo‘limining bildirishicha, tabdirkor va tashkilotning sobiq rahbariyati o‘rtasida nizo bo‘lgan. R.Sning xonadoni orqasidagi yer maydoni ortidan yuzaga kelgan. Taraflar mazkur yerga davogarlik qilmoqda.
– Holatni R.Sning o‘zi yoqib, tasvirga olib ijtimoiy tarmoqqa tarqatgan. Buni shu yerdagi qalamcha ekayotganlar ko‘rgan, – deydi “Paxtakor” uchastkasi bo‘limi boshlig‘i Gulzoda Ravshanova.
– Ayni vaqtda tergov ishlari olib borilyapti. Bu holat tashkilotni obro‘sizlantirishga harakat qilish. Oldingi rahbariyat uni uyining orqasidan uy-joy uchun noqonuniy qaror bilan yer ajratgan. R.S shu joydan uy qurib olgan, uyining orqasidagi 1 gektar yerni o‘ziniki deb o‘ylab qalamchalar qadashga qarshi chiqqan. Lekin biz bu yer xo‘jalikniki ekanligi uchun qalamchalar qadashni boshlaganmiz. R.S esa bunga qarshilik bildirib, shu ishlarga qo‘l urmoqda.
Tahririyat holat bo‘yicha yuqoridagi o‘rganishlardan kelib chiqib, nima bo‘lgan taqdirda ham holatga huquqiy va adolatli baho berilishini kuzatib boradi. Ammo, shunisi aniqki, o‘zaro nizolar sabab tabiatga, Ona zaminga bunday yo‘sinda zarar yetkazishga hech kimning haqqi yo‘q.
Eslatib o’tamiz, avvalroq ham «Paxtachida 300dan oshiq daraxtlar izsiz yo’q bo’lgan»i haqida xabar bergandik.
