Shu bilan birga nazorat tadbirlarida bir necha bor sifatsiz qurilish materiallarining qo‘llanayotgani, loyiha talablariga to‘liq amal qilinmayotgani, ayrim pudratchilarning mas’uliyatsizligi va ayrim noqonuniy qurilishlarning o‘z vaqtida rasmiylashtirilmayotgani kabi holatlar ham uchramoqda. Bu esa nafaqat ish sifati, balki kelgusida obyektlarning xavfsizligi va barqarorligiga ham salbiy ta’sir ko‘rsatishi mumkin. Shu bois, nazorat jarayonlarini yanada kuchaytirish, pudratchilar malakasini oshirish va noqonuniy qurilishlarga qarshi keskinroq choralar ko‘rish bugungi kunning dolzarb vazifalaridan biri bo‘lib qolmoqda.
Paxtachi tumanida olib borilayotgan keng ko‘lamli bunyodkorlik ishlari ham ana shu islohotlarning amaliy samarasini yaqqol namoyon etmoqda.
Bugungi kunda tumanda qurilish-montaj ishlari olib borilayotgan 64 ta obyekt Qurilish nazorati inspeksiyasi ro‘yxatiga kiritilgan bo‘lib, yil boshidan buyon ushbu obyektlarda jami 456 marotaba monitoring ishlari amalga oshirildi. Nazorat tadbirlari davomida jami 410 marotaba yozma ko‘rsatmalar berildi.
Shuningdek, o‘z xizmat vazifalariga sovuqqonlik bilan yondashganligi sababli 13 nafar qurilish ishtirokchisiga hamda yetarli sifatga ega bo‘lmagan qurilish materiallari va buyumlarini yetkazib berganligi uchun 4 ta qurilish materiallari ishlab chiqaruvchisiga nisbatan qonuniy choralar ko‘rish yuzasidan taqdimnomalar kiritildi. Mazkur chora-tadbirlar tuman hududida olib borilayotgan qurilish-mon-taj ishlarining sifatini oshirish, me’yoriy talablar asosida barpo etilishini ta’minlash hamda qurilish materiallari bozorida mas’uliyatni kuchaytirishga xizmat qilmoqda.
Ijrosi o‘z vaqtida ta’minlanmagan 11 ta yozma ko‘rsatma bo‘yicha jami 92 million so‘mlik 11 ta ma’muriy jarima qo‘llanildi. Shuningdek, 20 ta holatda sifatsiz bajarilgan qurilish-montaj ishlari buzdirish orqali joyida bartaraf etildi.
Masalan, Paxtachi tumanidagi 11-sonli maktabgacha ta’lim tashkiloti obyektida asosiy binoning oshxona qismida yuk ko‘taruvchi devorlarga terilayotgan g‘ishtlar sifatsiz bajarilgani sababli joyida demontaj qilindi. Yana bir holatda, tumandagi 36-maktabgacha ta’lim tashkilotida asosiy binoning birinchi qavat deraza chetlariga loyiha bo‘yicha sement qorishma berilishi belgilangan edi. Biroq pudratchi tomonidan ohak qorishma ishlatilgani, shuningdek, ikkinchi qavatda terilayotgan pardevorlarda loyiha talabidan chetlanib, “SG-2″ setka qo‘ymasdan ish bajarilgani aniqlanib, mazkur ishlar joyida demontaj qilindi va aniqlangan kamchiliklarni bartaraf etish choralari ko‘rilmoqda.
Bu kabi chora-tadbirlar qurilish-montaj ishlarining belgilangan me’yor va talablarga muvofiq bajarilishini ta’minlash, shuningdek, sifatni nazorat qilish mexanizmlarini yanada kuchaytirishga xizmat qilmoqda.
Ro‘yxatdan o‘tmagan qurilish ishlari bo‘yicha ko‘rilgan choralar
Joriy yil davomida tumanda 7 ta noqonuniy qurilish obyekti aniqlangan bo‘lib, shundan 1 ta obyekt belgilangan tartibda ro‘yxatdan o‘tkazildi. 2025-yil 1-iyul holatiga ko‘ra, ro‘yxatdan o‘tmagan 6 ta obyektning 1 tasini buzdirish bo‘yicha sudga da’vo arizasi kiritilgan, qolgan 5 ta obyekt bo‘yicha esa da’vo arizalarini kiritish ishlari hali ta’minlanmagan.
Aniqlangan noqonuniy qurilishlarga nisbatan 12 ta ma’muriy bayonnoma rasmiylashtirilib, jami 122 million so‘mlik ma’muriy jarimalar qo‘llanildi. Mazkur choralar tuman hududida qurilish-montaj ishlarini belgilangan tartibga muvofiq tashkil etish, shuningdek, qurilish intizomini mustahkamlashga xizmat qilmoqda.
Uy-joy qurilish dasturi ijrosi
Davlatimiz rahbari tomonidan tasdiqlangan “Uy-joy va ipoteka bozorini yanada rivojlantirishga oid qo‘shimcha chora-tadbirlar to‘g‘risida”gi Farmon asosida, Samarqand viloyatida 2025-yilda 135 ming xonadonli ko‘p xonadonli uy-joylarni qurib, foydalanishga topshirish rejalashtirilgan.
Mazkur rejaga muvofiq, Paxtachi tumanida 230 xonadonli 4 ta ko‘p qavatli uy-joy qurib, foydalanishga topshirilishi belgilangan. Bugungi kunga kelib, tuman hududida 65 xonadonli 2 ta uy-joy foydalanishga topshirildi. Shunday qilib, dasturning bajarilishi 28 foizni tashkil etmoqda.
Ushbu ko‘rsatkichlar tumanda uy-joy qurilishi rejalari izchil amalga oshirilayotganidan dalolat berib, aholi uchun zamonaviy turar joylar barpo etish yo‘lidagi ishlar davom etmoqda.
Tumanda olib borilayotgan qurilish ishlari nafaqat aholi uchun qulay turmush sharoitlari yaratishga, balki butun hudud infratuzilmasini rivojlantirishga ham xizmat qilmoqda. Qurilish sohasida nazorat mexanizmlarining kuchaytirilgani, me’yoriy talablarning qat’iy qo‘llani-lishi ham sifatli, xavfsiz va zamonaviy inshootlar barpo etilishiga zamin yaratmoqda. Shu bois, kelgusida ham tumanda bunyodkorlik ishlari izchil davom etib, yangi uy-joylar, ijtimoiy soha obyektlari va ishlab chiqarish maj-mualari barpo etilishi, tumanning iqtisodiy va ijtimoiy salohiyatini yanada oshirishga xizmat qiladi.
Sanjar QURBONOV, «PAXTACHI» gazetasi bosh muharriri
