Samarqand viloyati Qo‘shrabot tumanidagi 53-umumta’lim maktabida yuz bergan holat jamoatchilik o‘rtasida keskin e’tirozlarga sabab bo‘ldi. Maktab binosi ichida voyaga yetmagan bolalarga nisbatan kuch ishlatgan ayolning harakatlari huquq tartibot organlari tomonidan o‘rganib chiqildi.
Voqea qanday yuz bergan?
Aniqlanishicha, joriy yilning 3-aprel kuni 1-sinf o‘quvchilari darsdan so‘ng uyga qaytayotgan vaqtlarida o‘zaro kelisha olmay qolishgan. Ushbu kichik nizo ortidan, 6-aprel kuni 2018-yilda tug‘ilgan o‘quvchi bolaning 45 yoshli onasi maktabga yetib kelgan.
Ayol o‘quv xonasi ichida boshqa o‘quvchilar ko‘z o‘ngida janjal ko‘tarib, o‘g‘li bilan urishgan o‘quvchilarni ta’qib qilgan, ularni urgan va haqorat qilib, jismoniy hamda ruhiy bosim o‘tkazgan. Mazkur jarayon aks etgan videolavhalar ijtimoiy tarmoqlarda tarqalib, mutasaddilar e’tiborini tortdi.
Holat yuzasidan tuman Ichki ishlar bo‘limi tomonidan zudlik bilan tergovga qadar tekshiruv ishlari olib borildi. Tekshiruv natijalariga ko‘ra:
Ayolga nisbatan ma’muriy ish qo‘zg‘atildi. Bolalarga nisbatan zo‘ravonlik qilgan va jamoat tartibini buzgan ayolga nisbatan tegishli moddalar bo‘yicha bayonnoma rasmiylashtirildi. To‘plangan hujjatlar qonuniy chora ko‘rilishi uchun jinoyat ishlari bo‘yicha tuman sudiga taqdim etilgan.
Bolalar huquqlari va ularning ta’lim muassasalaridagi xavfsizligi qonun bilan himoyalangan. Maktab hududida o‘quvchilarga nisbatan har qanday ko‘rinishdagi zo‘ravonlik qat’iy javobgarlikka sabab bo‘lishi eslatib o‘tilmoqda.
