Qashqadaryo viloyatining Yakkabog‘ tumanida maktab direktori ikki o’quvchini boshini bir-biriga urishtirib, tanbeh berayotgani aks etgan video ijtimoiy tarmoqlarda tarqalgandi. Ushbu holat yuzasidan viloyat Maktabgacha va maktab ta’limi boshqarmasi rasmiy ma’lumot berdi.
Xabarda keltirilishicha, holat 2023-yilning 13-yanvarida Yakkabog‘ tumanidagi 80-maktabda yuz bergan. 2018-yildan buyon ushbu maktab direktori lavozimida ishlab kelayotgan T.A. 6-sinf (hozirda 7-sinf) o‘quvchilari Q.A. va T.E. sinf partalarini sindirishga uringani uchun ularni urib, tanbeh bergan. Bu muhokamada direktor xonasida kadrlar menejeri va boshlang‘ich sinf o‘qituvchilari ham bo‘lgan.
“Qashqadaryo viloyati Maktabgacha va maktab taʼlimi boshqarmasi o‘quvchilarning kaltaklanishi, majburiy taʼsir o‘tkazish holatini qo‘llab-quvvatlamaydi. O‘z lavozimiga bepisandlik bilan qaragan maktab direktori, ushbu jarayonga aloqador barcha pedagoglarga amaldagi qonunchilikka ko‘ra jazo chorasi qo‘llanishini maʼlum qiladi”, — deyiladi xabarda.
Hozirda esa ushbu maktab faoliyati alohida tartibda mehnat qonunchiligiga asosan o‘rganish ishlari olib borilmoqda. Holat Yakkabog‘ tuman IIB masʼul xodimlari nazoratiga ham olingan. Bolalar ombudsmanining munosabatida holat Yakkabog‘ tumani IIB tomonidan 9-martdan boshlab tergovga qadar tekshiruv olib borilayotgani hamda Bolalar ombudsmani holat yuzasidan o‘z kuzatuvini davom ettirishi aytib o’tilgan.
