Foto: «Baomoi.com
Yaqinda O‘zbekiston Respublikasi Prezidentining “Davlat tibbiy sug‘urta mexanizmlarini joriy etishga doir chora-tadbirlar to‘g‘risida”gi 311-qarorining mazmun-mohiyatini tushuntirish va ijrosini ta’minlash yuzasidan Paxtachi tumanining madaniyat binosida yig‘ilish o‘tkazildi.
Yig‘ilishni tuman tibbiyot birlashmasi boshlig‘i U. Suvanov, tuman hokimi o‘rinbosari A. Qo‘ldoshev, Birlashmaning DTS bo‘yicha koordinatori N. Egamberdiyevalar olib borishdi.
Unda, shuningdek, tumandagi 59 ta mahalla raislari, xotin-qizlari, ijtimoiy xodimlar va oilaviy poliklinika, oilaviy shifokorlik punkti mudirlari ishtirok etishdi. Avval, Paxtachi tuman tibbiyot birlashmasi boshlig‘i U. Suvanov yig‘ilishni ochib, kun tartibidagi masala va yig‘ilish ishtirokchilari bilan tanishtirdi.
Tuman aholisiga ko‘rsatilayotgan birlamchi tibbiy sanitariya yordamining samaradorligini oshirish, aholining ehtiyojmand qatlamlariga malakali tibbiy yordam ko‘rsatishni manzilli va maqsadli ta’minlashda birinchi navbatda amalga oshirilishi zarur bo‘lgan ishlar bo‘yicha to‘xtaldi. So‘ngra so‘z birlashmaning Davlat tibbiy sug‘urtasi bo‘yicha mas’ul koordinatori N. Egamberdiyevaga berildi va mamlakatimiz rahbarining yuqoridagi qarori yuzasidan taqdimot o‘tkazildi. Mazkur taqdimotda qarorning mazmun-mohiyati tushuntirildi.
Unga ko‘ra, davlat tibbiy sug‘urtasi doirasida bepul tibbiy xizmatlar ko‘rsatish va dori vositalarini taqdim etish – Davlat budjetiga to‘lanayotgan soliqlar hisobidan amalga oshiriladi. Bunda aholidan davlat tibbiy sug‘urtasi uchun qo‘shimcha to‘lov undirilmaydi, deyiladi.
Quyidagilarni nazarda tutuvchi davlat tibbiy sug‘urtasi mexanizmlari bosqichma-bosqich joriy etiladi:
davlat budjeti mablag‘lari hisobidan qoplanadigan tibbiy yordamning kafolatlangan hajmlari tasdiqlanadi va ushbu paketga kiritilgan tibbiy xizmatlar va dori vositalari Davlat tibbiy sug‘urtasi jamg‘armasi mablag‘lari hisobidan taqdim etiladi;
kafolatlangan paketga kiritilgan tibbiy xizmatlardan bepul foydalanish uchun aholi oilaviy shifokorga yoki tibbiyot brigadasiga murojaat qilish talab etiladi. Bunda oilaviy shifokor davolash va tashxislash standartlariga muvofiq tor soha shifokorlariga, zarur hollarda shifoxonaga elektron yo‘llanma beradi hamda bemor mazkur yo‘llanma asosida tor soha shifokori tomonidan ko‘rikdan o‘tkaziladi va yoki shifoxonaga yotqiziladi. Ushbu tartibga rioya etilmagan hollarda tibbiy xizmatlar pullik asosda ko‘rsatiladi;
shifokor rasmiylashtirgan elektron resept asosida dori vositalari kafolatlangan paket doirasida bemorlarga dorixonalar tomonidan bepul beriladi va dorixonalarning tegishli sarf-xarajatlari Jamg‘arma mablag‘lari hisobidan qoplanadi;
tibbiyot tashkilotlari faoliyatidagi jarayonlarni o‘z ichiga oluvchi boshqa axborot tizimlari bilan o‘zaro integratsiya qilinadigan “Elektron sog‘liqni saqlash” axborot tizimi yaratiladi va ishga tushiriladi;
kafolatlangan paketga kiritilgan tibbiy xizmatlar ko‘rsatilishiga davlat va nodavlat tibbiyot tashkilotlari ham jalb etiladi;
tuman, viloyat va respublika shifoxonalarida tibbiy yordam ko‘rsatishda kasallikning og‘irlik darajasidan kelib chiqib, bepul davolanadigan kasalliklar ro‘yxati tasdiqlanadi va amaliyotga joriy etiladi;
imtiyozli toifadagi shaxslar shifokor ko‘rsatmasiga binoan axborot tizimi orqali shakllantiriladigan yo‘llanma asosida respublika darajasidagi tibbiyot muassasalarida Davlat budjeti mablag‘lari hisobidan bepul davolanadi.
Davlat tibbiy sug‘urtasini joriy etish bo‘yicha tibbiyot xodimlari mahalla faollari bilan hamkorlikda aholiga tushuntirish, ommaviy axborot vositalari orqali targ‘ibot-tashviqot ishlarini amalga oshirishlari lozim ekanligi ko‘rsatib o‘tildi. Yig‘ilish so‘nggida ishtirokchilar tomonidan berilgan savollarga birlashma boshlig‘i U. Suvanov va koordinator N. Egamberdiyevalar qoniqarli javoblar berishdi hamda ishtirokchilarga Davlat tibbiy sug‘urtasi bo‘yicha bukletlar tarqatildi.
Madina ERKINOVA, «MUHIM24.UZ»
