Foto: pikabu.ru
Barcha matbuot kotiblarining mavqei tushirilmoqda. Oʻz navbatida oylik maoshlari ham pasaytiriladi. Bu haqda Oʻzbekiston Respublikasining “2025-yil uchun Oʻzbekiston Respublikasining Davlat byudjeti toʻgʻrisida”gi Qonuni ijrosini taʼminlash chora-tadbirlari toʻgʻrisida»gi qaror loyihasida keltirilgan.
Bilsangiz, O’zbekistonda matbuot kotiblarining mavqei rahbar oʻrinbosari darajasiga tenglashtirilgan edi. Endilikda esa ular departament rahbari, boʻlim boshligʻi, kotibiyat mudiri, guruh rahbari darajasiga tushirilmoqda.
Oʻzbekiston Respublikasi Prezidentining 27.06.2019-yildagi PQ-4366-son qaroriga muvofiq davlat organlari va tashkilotlari axborot xizmatlari rahbarlari bir vaqtning oʻzida davlat organi va tashkiloti rahbarining matbuot kotibi hisoblanib, axborot siyosati masalalari boʻyicha rahbarning maslahatchisi maqomiga ega boʻladi hamda mehnatga haq toʻlash, tibbiy va transport xizmati koʻrsatish shartlariga koʻra davlat organi va tashkiloti rahbarining oʻrinbosariga tenglashtirilgan edi.
Endilikda esa ushbu maqom oʻzgartirilmoqda. Yaʼni bir vaqtning oʻzida davlat organi va tashkiloti rahbarining matbuot kotibi hisoblanib, axborot siyosati masalalari boʻyicha rahbarning maslahatchisi maqomiga ega boʻladi hamda mehnatga haq toʻlash shartlariga koʻra davlat organlari va tashkilotlarining markaziy apparatlarida departament boshligʻiga, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida kotibiyat mudiriga hamda tuman (shahar)hokimliklari tuzilmalarida guruh rahbariga tenglashtiriladi.
