Amaldagi mehnat qonunchiligimizda ayollar mehnatiga oid ko‘pgina qo‘shimcha kafolatlar belgilangan. Xususan, qonunchilikka ko‘ra bolani parvarishlash ta’tillari davrida ayolning ish joyi (lavozimi) saqlanadi.
O‘zbekiston Respublikasi Mehnat kodeksining 234-moddasida bolani parvarishlash ta’tillari tartibi belgilangan bo‘lib, homiladorlik va tug‘ish ta’tili tugaganidan keyin ayolning xohishiga ko‘ra, unga bolasi ikki yoshga to‘lgunga qadar bolani parvarishlash uchun ta’til berilishi ko‘rsatilgan. Bundan tashqari, ayolga, uning xohishiga ko‘ra, bolasi uch yoshga to‘lgunga qadar bolani parvarishlash uchun ish haqi saqlanmaydigan qo‘shimcha ta’til ham beriladi. Bolani parvarishlash uchun beriladigan ta’tillardan bolaning otasi, buvisi, buvasi yoki bolani amalda parvarishlayotgan boshqa qarindoshlari ham to‘liq yoki uni qismlarga bo‘lib foydalanishlari mumkin.
Shuningdek, bolani parvarishlash ta’tillari davrida ayolning ish joyi (lavozimi) saqlanadi. Bu ta’tillar mehnat stajiga lekin hammasini jamlaganda ko‘pi bilan olti yil, shu jumladan mutaxassisligi bo‘yicha ish stajiga ham qo‘shiladi. Bolani parvarishlash ta’tillarining vaqti, basharti jamoa shartnomasida, korxonaning boshqa lokal hujjatida yoxud mehnat shartnomasida o‘zgacha hol nazarda tutilmagan bo‘lsa, keyingi haq to‘lanadigan yillik ta’til olish huquqini beradigan ish stajiga qo‘shilmaydi.
A. RAXMATULLAYEV,
Paxtachi tumani Adliya bo‘limi
Yuridik xizmat ko‘rsatish markazi
boshlig‘i
