Foto: UFA rasmiy sahifasidan
Dunyoning eng nufuzli sport nashrlaridan biri – ESPN bo‘lajak Jahon chempionatida ishtirok etadigan 48 ta terma jamoaning liboslari reytingini tuzib chiqdi. Ekspertlar jamoalarning uy, safar va uchinchi variantdagi formalarini tashqi ko‘rinishi hamda dizayn jozibadorligi asosida baholashdi.
Umumiy hisobda 105 ta libos joy olgan ushbu global ro‘yxatga o‘z tarixida ilk bor Jahon chempionati yo‘llanmasini qo‘lga kiritgan O‘zbekiston milliy terma jamoasining ham kiyimlari kiritildi.
Dizayn tendensiyalari: Bu yil nimalar urfda?
ESPN tahlilchilarining qayd etishicha, joriy yilgi mundial liboslarida ijodkorlikka juda katta urg‘u berilgan. Aksariyat terma jamoalar liboslarida xalq amaliy san’ati, mashhur me’moriy inshootlar, mahalliy madaniyat, davlat bayroqlari, milliy matolar, hayvonot dunyosi va hatto syurrealist rassomlar ijodidan ilhomlangan noodatiy dizaynlar ko‘proq ko‘zga tashlanadi.
O‘zbekiston liboslariga qanday baho berildi?
Reytingda O‘zbekiston milliy terma jamoasining liboslari turlicha pog‘onalarni egalladi:
-
Safar (ko‘k) libosi – nisbatan yuqoriroq baholanib, 84-o‘ringa loyiq ko‘rildi.
-
Asosiy (oq) libos – ro‘yxatning quyi qismidan, ya’ni 103-o‘rindan joy oldi.
Nashr mualliflari har ikki libosning dizayn jihatidan deyarli bir xil ekanligini, ular o‘rtasidagi yagona va asosiy farq faqatgina rang tanlovida (oq va ko‘k) ekanini alohida ta’kidlab o‘tishgan. Ko‘k rangli formaning oq ranglisiga qaraganda maydonda yorqinroq va boyroq ko‘rinishi uning yuqoriroq baholanishiga sabab bo‘lgan bo‘lishi mumkin.
Kuchli uchlikda kimlar?
Ekspertlar fikriga ko‘ra, jahon birinchiligidagi eng chiroyli va mukammal dizaynga ega liboslar quyidagilar bo‘ldi:
-
1-o‘rin: Urugvay terma jamoasining safar libosi;
-
2-o‘rin: Yaponiya terma jamoasining ikkinchi (safar) formasi;
-
3-o‘rin: Fransiya terma jamoasining ikkinchi formasi.
Tahririyatdan: Albatta, bunday reytinglar ko‘proq subyektiv estetik qarashlarga tayanadi va nisbiy xarakterga ega. O‘zbekiston terma jamoasining liboslari qaysi o‘rinda bo‘lishidan qat’i nazar, butun mamlakat futbol muxlislari uchun ushbu libosdagi yigitlarimizning Jahon chempionati yashil maydonlarida namoyish etadigan chiroyli o‘yini va g‘alabalari har qanday reytingdan balandroq turadi.
O‘zbekiston terma jamoasiga bo‘lajak tarixiy mundialda ulkan zafarlar tilaymiz!
