O‘zbekistonda nodavlat notijorat tashkilotlarida (NNT) faoliyat yuritayotgan yosh mutaxassislarni qo‘llab-quvvatlashning yangi mexanizmi joriy etilmoqda. Endilikda nufuzli xorijiy oliygohlarni tamomlagan yoshlarga har oylik maoshiga qo‘shimcha ustamalar beriladi.
“O‘zbekiston — 2030” strategiyasining “Mahallani rivojlantirish va jamiyatni yuksaltirish yili” davlat dasturiga muvofiq, dunyoning TOP–200 va TOP–500 talik reytingiga kiruvchi xorijiy OTM bitiruvchilari moddiy rag‘batlantiriladi.
Ustama olishning asosiy shartlari
-
Yosh chegarasi: Mutaxassis 30 yoshgacha bo‘lishi lozim.
-
Ish joyi: NNT uning asosiy ish joyi bo‘lishi shart.
-
Muddati: Ustamalar 3 yildan ko‘p bo‘lmagan muddatga tayinlanadi.
-
Cheklov: Yosh mutaxassis ustamaning faqat bitta turidan foydalanishi mumkin.
Ustama miqdorlari qancha?
Qo‘shimcha to‘lovlar miqdori oliygoh reytingi va ta’lim darajasiga qarab, Bazaviy hisoblash miqdori (BHM) asosida belgilanadi:
TOP–200 reytingidagi OTM bitiruvchilariga:
-
Bakalavriat uchun — BHMning 7 baravari miqdorida;
-
Magistratura uchun — BHMning 10 baravari miqdorida;
-
PhD (yoki unga tenglashtirilgan ilmiy daraja) uchun — BHMning 15 baravari miqdorida.
TOP–500 reytingidagi OTM bitiruvchilariga:
-
Bakalavriat uchun — BHMning 5 baravari miqdorida;
-
Magistratura uchun — BHMning 7 baravari miqdorida;
-
PhD darajasi uchun — BHMning 10 baravari miqdorida.
Arizalar qanday topshiriladi?
Qo‘shimcha ustama olish istagida bo‘lgan yoshlar arizalarini elektron shaklda www.ngo.uz platformasi orqali yuborishlari mumkin. Kelib tushgan ariza va hujjatlar maxsus komissiya tomonidan ko‘rib chiqiladi hamda tavsiyanoma berish yoki rad etish bo‘yicha yakuniy qaror qabul qilinadi.
